http://www.andecha.org/images/stories/dda-2010/pasucais.JPG

Andecha Astur cellebró esti sábadu los sos venti años d’esistencia y conmemoró la declaración de soberanía del 25 de mayu de 1808 nun día pa recordar y nel que participó la organización xuvenil Darréu y al qu’asistieron delegaciones de Corriente Sindical d’Izquierda, Coordinadora Antifacista d’Asturies, Bloque por Asturies, Los Verdes d’Asturies, Partíu Asturianista, Partíu Carlista d’Asturies o Fai!.

El XIII Día d’Andecha entamó a les 18:30 hores nes Escueles Vieyes de Villaviciosa. A les 19:30 hores un pasucais con banda gaites percorrió les cais céntriques de la villa. A les 20:30 hores entamó l’actu políticu énte unes 200 persones. Daniel Cueli, que fore voceru y ún de los fundadores del conceyu d’Andecha Astur de Villaviciosa, anguañu del Conceyu de Nava d'Andecha. L’actu entamó coles intervenciones y saludos de les distintes delegaciones que foron presentaes Cueli y aplaudíes polos presentes. Les felicitaciones a Andecha Astur polos sos venti años d’esistencia y les llamaes al trabayu en comuña foron la tónica xeneral. Tres la ronda d’intervenciones de les organizaciones convidaes llegó’l momentu pa les intervenciones polítiques d’Andecha Astur y Darréu.

Empicipió Paloma García, vocera de la organización xuvenil Darréu, siguio la intervención de Xandru Vega, voceru del Conceyu d’Andecha Astur en Villaviciosa y remató l’actu el voceru nacional d’Andecha Astur Mariu Arbesú. Los trés sorrayaron la importancia de la conmemoración de la soberanía de 1808, lo dificil de cumplir venti años de trabayu políticu en defensa d’Asturies y del pueblu trabayador asturianu y na necesidá del proyeutu políticu d’Andecha Astur.

Paloma García, fexo referencia a la necesidá de proyeutos como Darréu o Andecha Astur “qu’ente otres munches coses, miren pol futuru de la mocedá asturiano”. “Si queremos vivir nuna Asturies con futuru ye imprescindible la llucha de los xóvenes al traviés d’organizaciones como Darréu, hai qu’organizase p’asina poder defendemos” sorrayó la vocera de la organización xuvenil independentista. García animó a la mocedá asturiano a sumase al proyeutu, “porque toes y toos somos necesarios nesti camín pola nuesa llibertá”.

Xandru Vega, pela so parte, centró la so intervención na política llocal. Entamó remembrando que’l Conceyu d’Andecha Astur en Villaviciosa cumple esti añu 12 años y lo dificil del camín recorríu, agradeciendo a toles persones que lo ficieron posible. Vega foi duru colos gobernantes del Conceyu. “Nestos 12 años, vivimos dos gobiernos, unu cacique del PP y agora otru de URAS-PAS cacique y desordenáu. Nada nun camudó en Villaviciosa nestos años”. El voceru d’Andecha Astur Villaviciosa sorrayó tamién la vitalidá del proyeutu d’Andecha Astur y la so necesidá en Villaviciosa y n’Asturies, esixendo a los que ponen torgues “que nos dexen trabayar tranquilos”. Pa finar, Vega agradeció’l sofitu de persones y establecimientos que collaboraron na organización del Día d’Andecha.

Mariu Arbesú, zarró les intervenciones polítiques del XIII Día d’Andecha. El voceru nacional de la organización. Tres agradecer la presencai a toles delegaciones d’otres organizaciones presentes nel actu, sorrayó la importancia del 25 de mayu de 1808 y “los otros díes nacionales”, el 5 d’ochobre de 1934 y el 24 d’agostu de 1937. Los venti años d’Andecha tamién centraron parte de la intervención sorrayando qu’una organización “va construyéndose a lo llargo los años”. “Andecha Astur si nun esistiere habría qu’inventala y habriamos perdio yá 20 años de compromisu social y políticu con Asturies” sorrayó.

La cris social y el mundiu cambiante que vivimos tamién foi protagonista nel discursu, p’Arbesú “la severidá de la crisis mundial xunido a la vulnerabilidá d’Asturies ensin poder políticu dalu dientru’l estáu Español situanos na necisidá urxente d’algamar poder pa defendenos como asturianos y asturianes y como trabayaores”.

La parte final de la intervención centróse na xunidá d’aición y l’apueste por “falar con toos”. “Queremos falar con toles fuercies polítiques asturianes, col PAS, el BPA, con UNA, col PCPE d’Asturies, con sindicatos, con movimientos sociales, con toos aquellos axentes activos de la sociedá asturiana que coincidamos na necesidá de desterrar d’Asturies definitivamente a la FSA, al PP y a IU”, afitó.

El voceru d’Andecha Astur remató la intervención tendiendo la mano “a toos y toes vosotres pa partiendo d’esta dinámica xunitaria pa siguir falando y viendo les diferentes posibilidaes de xuntura respetando la soberanía de les organizaciones y la validez y llexitimidá de cada proyeutu políticu buscando siempres l’interes d’Asturies y de los nuesos paisanos y paisanes”.

Fináu l’actu políticu, cola interpretación de "La Flor del Agua", foi’l momentu de la espicha popular onde los presentes pudieron confraternizar y charrar. Pasaes les diez de la nueche, entamaba’l Conciertu del XIII Día d’Andecha.

N’Ochebre, grupu mozu que vien pisando perfuerte y que fexo una perbona actuación que caleció motores del munchu públicu presente. Los dalgo más veteranos Taranus foron los siguientes n’entrar n’escena y tampoco nun defraudaron. Pa rematar, un grupu históricu del rock asturianu como Dixebra piesllaba’l XIII Día d’Andecha énte alredor de mediu millar de persones que disfrutaron d’una nueche inolvidable en Villaviciosa.

Foron munches les persones qu’a lo llargo de la xornada s’averaron hasta les escueles vieyes de Villaviciosa pa compartir con nós el nuesu vixésimu aniversariu. A toos ellos queremos da-yos les gracies.